شعب حاسب روحو موديرن و شيك و هو ما يقبِلشْ الكريتيك...
شعب التجعوين و التلعويك......
شعب إذا إحترمتو يعفس عليك...
اللّهم تُنزِر ْ و تحمّر عليه عينيك...
قبل ما يفكّر باش ياذيك...
إنت تدخل معاه ديرَاكِت في الموضوع و هو يتجبّد عليك كيف اللاّستيك...
شعب ما فاهم منها شيء و حاسب روحو قافز و يحب يعلمك و يورّيك...
شعب تافهة أفكارو و راسو فارغ ما يفرّقش بين الإعلاميّة و الميكانيك...
شعب إذا حبْ منّك على مصلحة يبَسْبِس بيك و يبالغ في محبتو ليك...
شعب فيه إلّي تحسبو صاحبك و عشيرك و هو إلّي بالنّار في أوّل فرصة تجيه يكويك...
شعب إنت تتمنّالو الخير و هو يحبّك تطيح باش يشيخ و يضحك عليك...
شعب يضحكلك في وجهك ضحكة صفراء و أوّل ما تدور الدّورة يبدى يقطَّع و يريِّش فيك...
شعب يموت على الرّياء و الكذب إذا تشكرو يفرح و إذا تعدّدْلو عيوبو يسَمْعِك الكلام و يدور عليك...
شعب يطالب بالدّيمقراطية و إذا قتلو أنا مالنّهضة و إلاّ يساري يطفّيك و ما عادش يدور بيك...
شعب عمل ثورة على الخدمة و هو شطر مواطن الشّغل حرقهم في اللّيل كيف إنت ترقد و تغمّض عينيك...
شعب عجيب و غريب...
شعب ما يفكّرش في غدوة و يصرف في نهار تحويشة عمرو و يقولك أصرف ما في الجيب يأتيك ما في الغيب...
شعب خرّجنا من ظلم القمع و دخّلنا تحت رحمة إلّي في قلوبهم الطمع...
شعب فقير ما فوقوش فلوس...
و كيف يجي يعرّس يصرف مليار و بعد العرس يحوس و يلوس...
شعب كان تثيْقو و تحكيلو سرّك لأول واحد يسأل شبيه فلان يغدرك و يبيعك...
حاصيلو شعب خارج عالسّرب...
شعب موش عارف إلّي هو عمل ثورة و مازال داخل بعضو و في مخّو محلولة حرب...
أنا مانيش نحكي عليك...
كلامي موجّه لشعب ماشي عكس السّير بلاش بيك...
آما كان إنت واحد منهم وقتها الله غالب عليّا و عليك....
أسماء الصّخري الغرسي
No hay comentarios:
Publicar un comentario